2023 жылдың 31 наурызында Астанада кәсіпқой боксшы Фируза Шәріпованың алдағы жекпе-жегіне арналған «Дала қырандары» жастар қоғамдық бірлестігі ұйымдастырған баспасөз мәслихаты өтті. Таразда өтуі жоспарланған бұл кәсіби бокс кеші ең рейтингтік телеарналардың бірінде көрсетіледі.

Баспасөз мәслихатына боксшы Фируза Шәріпова, оның менеджері Сергей Завилейский және «Дала қырандары» жастар қоғамдық бірлестігінің үйлестірушісі, грек-рим күресінен Азия чемпионы, Лондондағы Олимпиада ойындарының қатысушысы, Халықаралық дәрежедегі спорт шебері Асхат Рахатұлы Ділмұхамедов қатысты.

Фируза Шәріпова – үш салмақ дәрежесінде әлем чемпионы, Тараз қаласының тумасы. Кәсіби рингте 2016 жылдың 21 мамырында Олимпиаданың күміс жүлдегері София Очигавамен жекпе-жекте дебют жасады. Қазіргі уақытта ол 17 жекпе-жек өткізіп, 15 жеңіске жетті, оның 8-і мерзімінен бұрын аяқтады. Сондай-ақ, ол ММА ережелері бойынша екі жекпе-жек өткізіп, екеуінде де жеңіске жетті. Отандасымыз танымал бапкер Феликс Тихонович Цойдың басшылығымен бокс мансабын бастады және ол жаттықтырған жалғыз қыз болды.

Баспасөз мәслихаты барысында Фируза Шәріпованың сәуір айында Алматыда ММА ережелері бойынша тағы бір жекпе-жегі өтетіні туралы жарияланды. Қарсыласының кім болатыны нақты айтылған жоқ. Бірақ оның тай боксынан Еуропа чемпионы екені айтылды.

Баспасөз мәслихатынФируза Шәріпова өзінің бокс қолғаптарына қол қойып, оны ең қызықты сұрақтар қойған екі қатысушыға табыстады.

Айта кетсек, 20 мамыр кешінің басты оқиғасы – қазақстандық Фируза Шәріпова мен Малави чемпионы Рут Чисейл WBC Silver атағын сарапқа салады. Кездесудің жеңімпазы қазіргі уақытта WBC тұжырымының басты атағына иелік ететін Кэти Тейлормен қолғап түйістірмек.